-¿Cales son as razóns polas que
estades en contra da apertura da mina?
Este
é un proxecto altamente contaminante, que destrúe o noso modo de vida, a nosa
economía local, provoca división social e danos irreversibles na nosa terra.
A
superficie afectada pola mina vai ser de unhas 700 Ha de monte arborado e
produtivo de moi boa calidade, que constitúe un importante sustento económico
para os veciños de Corcoesto.
As
fontes de auga que se atopan na area afectada pola explotación van a
desaparecer, xa que as cortas do terreo chegan a profundidades de ata 300 m,
moi por debaixo do nivel freático. Estas fontes, abundantes e de moi boa
calidade, abastecen ó 80% dos fogares da parroquia, polo que a súa perda suporía
un retroceso na nosa calidade de vida, sobre todo si se ten en conta que o
abastecemento se fai sen custe para os veciños a través de traídas veciñais.
A economía local ligada ó medio
veríase moi gravemente afectada. Actividades como a gandería, a agricultura, as
explotacións forestais e o turismo rural, son totalmente incompatibles coa actividade
mineira.
Ademais das perdas do potencial económico derivado destas actividades, os
veciños sufriremos un perda moi importante do valor do noso patrimonio. Os
nosos montes serán expropiados e os nosos bens inmobles, casas e fincas,
perderán todo o interese que puideran ter para persoas que procuran unha
segunda vivenda nunha contorna natural privilexiada, tranquila e afastada dos
núcleos urbanos, xa que o desenvolvemento da vida na parroquia con unha
actividade altamente contaminante e ruidosa, veríase gravemente afectada.
A
actividade mineira ten previsto un consumo de auga de máis de 1 millón de
litros diarios, a cantidade de cianuro de sodio a empregar diariamente e de 1,4
tn e vaise construír unha balsa de
lodos cunha superficie aproximada de 1.800.000 m2 que albergará uns 17 millóns
de toneladas de materiais extractivos, dos cales máis de 100.000 tn son
residuos contaminados con cianuro, procedentes do proceso de lixiviación. É
dicir, residuos perigosos que quedarán para sempre nos nosos montes.
Algúns
fogares de Corcoesto están
situados a menos de 70 m de distancia dos furados, a menos de 200 m da balsa de
lodos, e a uns 30 m da planta de tratamento.
As
quendas de traballo previstas serán de 12 horas as 24h do día. Construirase
unha planta de tratamento que ocupará unha superficie de uns 30.000 m2. Esta planta
albergará tres muíños de moenda que trituraran o mineral onde se atopa o ouro a
diferente granometría traballando as 24h tódolos días, o que, xunto co resto da
maquinaria empregada, provocará unha contaminación acústica que perturbará
gravemente, como xa se ten dito, a tranquilidade da parroquia.
Na
actividade mineira está previsto empregar dinamita cunha frecuencia dunha
voadura por día. No proxecto contémplanse dous tipos de voaduras, a tipo A e a
tipo B. A tipo A é a máis agresiva, pois precisa de 2.700 barrenos capaces de
arrincar 38.000 m3 de material en cada voadura. Isto provocará, sen dúbida, danos
nas estruturas das nosas vivendas e afectará de xeito moi significativo ó
gando, a outros animais domésticos e a fauna salvaxe.
As
verteduras previstas de materiais pesados (Níquel, Arsénico, Chumbo) superan os
límites legais. Estes metais son arrastrados polas augas de escorrenta e van
parar directamente ó río Anllóns que virte as súas augas en zonas moi ricas
para o marisqueo, como son o estuario de Cabana e a ría de Corme e Laxe.
O
proxecto mineiro vaise a desenvolver moi preto do río Anllóns, que é un lugar Lugar
de Interese Comunitario (LIC). En caso de calquera accidente todo vai parar ás
súas augas, polo tanto, as rías de Cabana, Corme e Laxe, estarán
permanentemente en perigo durante o tempo de actividade da mina, e despois, por
centos de anos, polos residuos acumulados pola mina depositados nas balsas.
-¿Que vos levou a organizar esta
plataforma?
A
plataforma constituíuse para defender os intereses da parroquia, do seu
patrimonio natural, do seu modo de vida e da súa economía ligada ó medio. É
unha iniciativa que xurde porque os veciños de Corcoesto sentímonos totalmente
indefensos ante as nosas administracións (Xunta e Concello) que claramente se
manifestaron como partidarias da apertura da mina, e polo tanto, nunca nos
tiveron en conta nin nos teñen. No caso
do Concello, digamos, do Alcalde de Cabana de Bergantiños, o desprezo cara ós
veciños foi e é total, e mesmo intentou, nun primeiro momento, unha persecución
“policial”, propia doutros tempos, contra os membros da plataforma.
Como
sociedade civil que somos, organizada a través da figura de plataforma, non queremos
que destrúan e vendan a prezo de saldo a nosa parroquia. Queremos o noso
patrimonio e queremos desfrutalo, explotalo de xeito sostible e deixalo en
herdanza para que as xeracións vindeiras tamén o poidan desfrutar.
-¿Que accións estades levando a
cabo para loitar contra a mina? ¿Tiveron algún efecto ata o momento?
Temos
presentadas alegacións ó proxecto cando foi sometido a exposición pública
mediante a súa publicación no DOGA. As alegacións, apoiadas en informes
técnicos, foron asinadas por máis de 1.300 persoas. Ao mesmo tempo fomos
establecendo contactos e mantendo reunións con diversos partidos políticos,
algún dos cales, concretamente o
BNG, foi quen de levalo ao Parlamento de Galicia e ao Parlamento
Europeo.
Ademais
do anterior, levamos a cabo unha labor de divulgación e de información do
proxecto tanto con veciños coma cos medios de comunicación e por suposto tamén,
prestámoslle especial atención ás redes sociais como ferramenta de comunicación
das nosas actividades e das nosas preocupacións.
Desde
a plataforma mantivemos contactos con outras asociacións ecoloxistas, e en
especial con Verdegaia, que colaborou con nós dende o principio e sigue
colaborando de maneira moi activa.
Tamén
estamos facendo un seguimento especial de toda a normativa e a lexislación aplicable
ás actividades mineiras que nos permita actuar contra este proxecto, e tratamos,
dentro das nosas posibilidades, de velar polo axeitado cumprimento da
normativa, tanto por parte da empresa mineira como por parte da Xunta de
Galicia.
En
xeral consideramos que todas estas accións teñen logrado e operado moitos
efectos importantes. Quizais o mais destacable, polo seu impacto de cara ó
público, sexa o feito de ter mostrado unha clara oposición da veciñanza ao
proxecto mineiro. Esta oposición pública, canalizada a través dos medios de
comunicación, logrou contrarrestar a propaganda da empresa mineira e do propio
Concello de Cabana a favor do proxecto. A aparición da plataforma non lles
facilitou as cousas fronte a cidadanía de Corcoesto nin da Comarca, pois esta
tivo a oportunidade de comprobar e coñecer a realidade do despropósito que se
pretende levar a cabo na nosa parroquia coa complicidade das autoridades.
-¿Onde estades atopando unha
maior oposición (Empresa, Concello, Xunta), e cales pensades que son as razóns,
quizais un interese a maiores do económico da empresa? ¿Político quizais?
Como
xa manifestamos, a oposición atopámola en todas as administracións, tanto a
nivel autonómico como a nivel do Concello. A empresa mineira, por suposto, fai
o seu traballo, aínda que os seus métodos non son os mais axeitados para
empregar nun país desenvolvido como Galicia. Pero isto débese a que están
acostumados a traballar en países onde as persoas teñen poucos dereitos e pouca
capacidade para facelos valer.
O feito de que a Xunta de Galicia estea tramitando
este proxecto como “industrial estratéxico” amparándose nunha lei que permite
todo con tal de crear 250 empregos, dando igual a duración e as condicións dese
emprego, transmítenos unha pobre e cativa visión do país. Si a isto engadimos que o
proxecto utiliza unha tecnoloxía altamente contaminante e nada innovadora, a
actuación da Xunta é aínda mais cuestionable, si cabe.
Como plataforma consideramos que a tramitación
deste proxecto como estratéxico é unha trampa e un engano ós cidadáns que lle
permite á empresa unha tramitación vip, facilitándolle moitos dos
requisitos e saltándose moitos dos prazos que obrigatoriamente debería cumprir
e observar para obter a autorización de explotación mineira.
No
que se refire ó Concello, a súa subordinación a empresa e total. O Alcalde
comprácese de posuír máis de 500 curriculums para traballar na mina, actuando
así como director de recursos humanos da empresa. Este persoal é seleccionado a
dedo, sen ningún pudor, por parte do Alcalde, e sen atender a ningún tipo de
méritos nin puntuación que lle outorguen un escalafón atendendo a criterios de
valoración profesional e xustiza social, o que claramente constitúe unha
actividade caciquil á antiga usanza.
O seu trato cos veciños que rexeitan a mina deixa
moito que desexar, utilizando prácticas represivas que criamos esquecidas xa hai
décadas.
Os políticos,
tanto a nivel Autonómico cono Local, intentan vender o proxecto como unha gran
oportunidade de creación de emprego e de inxección económica para a zona, coa
intención de sacarlle réditos políticos e "quizais algúns máis". A súa
credibilidade neste momento é nula, e con respecto a isto nós afirmamos que o
proxecto mineiro é pan para hoxe e fame para mañá.
Por parte da empresa, o feito de que todos os
políticos estean traballando para eles, facilítalle moito as cousas. Como xa dixemos, eles fan o seu
traballo. Aprovéitanse dos veciños que poden para acceder ós seus montes ó
menor custe posible, e xogan coas falsas promesas de creación de postos de
traballo e de prosperidade económica para a zona, pregoadas ós catro ventos,
para convenceren á xente que ten os oídos moito mais receptivos nunha situación
de crise económica xeneralizada.
-¿Existe algún partido político
que vos apoie especialmente?
O
único partido que levou o tema ó Parlamento Galego e ó Parlamento Europeo foi o
BNG, pero danos a impresión que non cala o suficiente nas súas conciencias este
problema, posto que algunhas das súas manifestacións, tanto a nivel Local como
Autonómico, foron un tanto ambiguas.
Isto
non foi así en Europa xa que a súa europarlamentaria Ana Miranda, fixo unha
oposición moito mais firme ao proxecto a través do grupo dos Verdes. Nestes
momentos tamén temos unha reunión pendente con Alternativa Galega de Esquerda e
co PSOE.
Outro
partido que nos apoiou moi activamente desde o principio e que sigue
colaborando de maneira moi estreita con nós, é o Partido da Terra, que ten
amosado unha sensibilidade especial por este asunto.
-Coñecedes casos semellantes de
reapertura de minas de ouro, e nese caso ¿Existen plataformas como a vosa que
se opoñan?
Coñecemos
a plataforma Oro No en Tapia de Casariego en Asturias e incluso un amplo número de veciños viñeron a Corcoesto
a apoiarnos e a solidarizarse con nós. Foi un contacto moi importante para nós,
que seguimos mantendo a través das redes sociais e do correo electrónico.
Eles
conseguiron rexeitar un proxecto moi parecido ó noso e coa mesma empresa. Agora
parece que a empresa volve a intentalo, pero de xeito subterráneo a través de
galerías.
Outro
contacto que mantemos e con veciños de Esquel, na Arxentina, cos que
compartirmos a mesma loita e as mesmas preocupacións en contra da minaría a ceo
aberto.
-¿Pensades que existe algunha alternativa factible á mina que
poda xerar emprego?¿Cales pensades que poderían ser esas potencialidades na
zona?
Pensamos que existen moitas alternativas
respectuosas co medio, xeradoras de emprego e sostibles a longo prazo. Por exemplo:
-Explotacións
de vacún de carne.
A
raza rubia galega é unha das máis estendidas na nosa Comunidade Autónoma. No
canto de utilizar os montes para un proxecto mineiro, unha boa alternativa
sería a de unir e cercar a maior extensión de monte co fin da produción de
carne, xerando así postos de traballo e mantendo limpos os montes evitando
incendios forestais.
-Fungos.
Utilizar
os nosos montes para realizar unha plantación de fungos comestibles sería outra
alternativa viable e xeradora de valor para a nosa parroquia, xa que este
produto está cobrando unha crecente importancia no sector alimentario.
-Horta.
Corcoesto
é unha parroquia que destaca pola fertilidade do seu solo, o que a fai apta
para a produción hortícola.
A
xente de Corcoesto podería constituír unha cooperativa de produción hortícola.
Isto podería facerse poñendo en común terreos, orientando as producións cara a
variedades autóctonas galegas, planificando axeitadamente os cultivos e
dirixindo estas producións cara as canles curtas de comercialización,
fundamentalmente a través da venta directa ao consumidor final e á canle HORECA.
Neste
ámbito, tamén existen outras experiencias desenvolvidas co apoio da gran
distribución, como GADISA e VEGALSA-EROSQUI, que garanten a compra de todas as
producións locais de temporada a prezos razoables para os produtores. Estas
experiencias, aínda que con unha estratexia comercial totalmente diferente ás
anteriores, teñen contribuído á xeración de riqueza e emprego nos lugares onde
se desenvolveron, e a través delas, recuperáronse para a produción terras
abandonadas.
-
Centro de recuperación de especies autóctonas.
En
Galicia existen diversas especies autóctonas en perigo de extinción, como poden
ser: No gando bovino, as razas Cachena,Caldelá, Frieiresa e Vianesa, a ovella
galega,a galiña de Mós, o cabalo de PRG, o porco Celta, e a cabra autóctona.
Para a recuperación destas especies existen diversos centros como poden ser
" O Veral" en Lugo e o de Rodicio en Ourense, nos que se leva a cabo
unha labor de cría destas especies. Pensamos que se poden desenvolver
iniciativas de cría de estas especies e de comercialización destes produtos a
través dos circuítos curtos de comercialización e de procesos de transformación
xeradores de valor engadido.
-Forestal
Os montes de Corcoesto, coma outros moitos en
Galicia, poden facerse máis rendibles a través dunha xestión forestal ordenada.
Na actualidade existen fórmulas de xestión forestal baseadas no asociacionismo
que permitirían incrementar a rendibilidade do noso monte e ao mesmo tempo
contribuirían á xeración de emprego derivado da necesaria conservación e
mantemento.
Non podemos perder de vista que o monte é unha
fonte de riqueza (e de aforro para os seus titulares), que permite o desenvolvemento de actividades complementarias
á básica de produción de madeira, como as xa mencionadas gandería, a produción
de cogomelos, e outras como a produción de material vexetal para biomasa.
-
Embotelladora de auga.
Tendo
en conta a boa calidade da auga da nosa parroquia e sabendo que co proxecto
mineiro as fontes, pozos... van desaparecer, poderíase seguir co
autoabastecemento e mesmo crear unha embotelladora de auga. Esta proposta non
necesita unha gran estrutura nin ten un custe moi alto.
-
Formación e rehabilitación de vivendas con criterios de bioconstrución
Esta
é unha actividade en expansión con potencialidade para a creación de emprego a
través de procesos de rehabilitación de vivendas con materiais ecolóxicos e
locais, que aportarían ás vivendas, calidade, confort e aforro enerxético. Na
parroquia xa se teñen parado proxectos de rehabilitación por culpa da mina. Hai
que ter en conta que a crise da construción afecta principalmente á contorna
urbana, e sobre todo ás novas vivendas, pero non á rehabilitación.
-
Turismo rural.
Corcoesto
posúe un gran patrimonio natural, cultural e construcións típicas do rural
galego. Algunhas iniciativas neste ámbito tamén xa se paralizaron e os que seguen
adiante, fano pensando unicamente en facer rendible o proxecto en base á
ocupación por parte dos empregados da mina e das súas contratas.
A
realidade vai ser ben diferente do que pensan, pois ningún dos traballadores se
aloxará neste tipo de establecementos, onde non poderán durmir, xa que algún
deles, atópase á escasos metros das infraestruturas de moenda do material.
-No peor dos casos, ¿Cales
poderían ser as consecuencias ambientais da apertura da mina?
A
primeira consecuencia da mina é a ocupación e a contaminación de unhas 700 ha
de monte. Esta superficie (8 Km2), que representa a metade da superficie da
parroquia de Corcoesto (13,9 km2), sería expropiada ós veciños e contaminada
para sempre.
Outra
consecuencia case inmediata da mina, sería que a meirande parte das fontes de
auga que hoxe coñecemos, desaparecerían.
A peor das consecuencias, e que
ademais, segundo os expertos non é imposible que aconteza, sería un accidente con
cianuro de sodio.
Este material está catalogado coma materia perigosa (moi tóxico e corrosivo), e
as consecuencias dun accidente serían desastrosas non só para a poboación de
Corcoesto, senón tamén para outras parroquias limítrofes. Dependendo da gravidade do accidente, sería necesario evacuar de xeito
inmediato á poboación a máis de 2,6 km de distancia, provocando unha
contaminación do entorno con consecuencias moi graves e irreparables.
Outra
consecuencia gravísima, sería que se produza unha rotura da balsa de lodos e
como consecuencia se produza un gran derrame dos materiais extractivos
procedentes da actividade mineira, entre eles, os contaminados con cianuro no
proceso de lixiviación. Estas miles de toneladas irán ó río Anllóns e parar a ría
de Cabana provocando unha gran catástrofe ecolóxica, semellante a outras que xa
teñen acontecido en Romanía e en Aznalcollar en España.
-Se a empresa garantira unhas
condicións medioambientais aceptables, ¿Estariades de acordo coa apertura da
mina?
Nunca
estaríanos de acordo coa apertura da mina, xa que a tecnoloxía que emprega é
obsoleta e altamente contaminante. A minaría con cianuro está prohibida en
países como Alemaña, Romanía e no propio pais de orixe da empresa, en Canadá.
Existe ademais unha resolución do Parlamento Europeo UE B7 0240/2010 instando ós
países membros a prohibir a utilización do cianuro.
Si o crecemento económico non é sostible e
respectuoso co medio, non é un crecemento que mereza a pena. A crise económica non debe
servir de pretexto para aprobar proxectos deste tipo que arruínan o futuro do
noso pais.
-¿Que lle diriades aos veciños da
zona que están a favor da mina?
O
único argumento que utilizan os veciños para defender a mina é o traballo. Ante
iso nos dicímoslles que o traballo non dignifica ó ser humano, senón que é o
ser humano quen ten que dignificar o traballo. Non podemos admitir que alguén
estea disposto a traballar na destrución do seu. Sería inimaxinable que
calquera de nós aceptase un traballo ofrecido por unha empresa para destruír a
nosa casa. Isto é o que están facendo en Corcoesto, ofrecéndonos un traballo
para destruír a nosa parroquia.
En
calquera caso, estar en contra da mina non é estar en contra do traballo, pero
a xente debe saber que moi poucos de Corcoesto traballarán na mina, sinxelamente
porque alí non se atopa man de obra suficientemente cualificada e o postos de
traballo ós que poidan optar, serán os menos cualificados, os mais arriscados e
os mais baratos.
Por
outra banda, trece anos de explotación non son nada e despois a degradación
económica da zona será total. Hoxe, o 44% dos pobos abandonados de Asturias son
mineiros. Corcoesto non é unha zona
degradada como a quere presentar a empresa e tamén agora o Concello.
Corcoesto ten un gran potencial agrícola, gandeiro e forestal, e é
responsabilidade das Administracións xunto cos cidadáns, dinamizar e apoiar
proxectos máis duradeiros e sostibles, que fixen poboación e relancen a economía
local. Por desgraza, as políticas nefastas das nosas Administracións son totalmente
contrarias co respecto á natureza, á vida e ó futuro, e neste caso concreto,
temos a sensación de que están a vender o noso país a prezo de saldo a unha
multinacional para que nos explote e destrúa a nosa terra.
Deixamos aquí o enlace por se alguén quere coñecer máis a fondo a opinión da Plataforma.
http://nonaminadecorcoesto.blogspot.com.es/p/mais-informacion.html
E vós que opinades sobre este tema?
Firmado: Arturo e Daniel.
